Wunpawng Mungdan Shanglawt Hpung (KIO) Masat N'htoi hpawng galaw

2007 ning October 25 ya shani hkying 11:00am hta Laiza Muklum, Sinpraw Majoi Manau Gawknu hta Wunhpawng Mungdan Shanglawt hpung (KIO) masat n'htoi galaw ai lam chyelu ai.

Zuphpawng hpu-awn Salang Tsinyu Hkun Nawng kawn (KIO) masat n'htoi hpawng hpaw mungga shaga sai. Dai hpang zuphpawng hpu-awn woi awn ai hte du sa ai shawa yawng Amyu Sha dawnghkawn hpe hkungga jaw sai. Zuphpawng tingnyang up Du Kaba Hpunggan Zau Nan hpawng mungga shaga sai. Wunhpawng Mungdan Shanglaw hpung (KIO) hpung shang masha marai (77) hpe ga shaka (Oath) jaw ai lam Du Kaba Gum San Seng kawn woi awn galaw sai.

KIO masat n'htoi mungga hpe KIO Ginjaw Komiti Tingnyang Up Malai (1) Du Kaba Gauri Zau Seng kawn shaga sai. Du Kaba Gauri Zau Seng tsun ai hta, KIO hpe galoi kaw nna shangai shaprat dat ai lam, KIO kawn galaw lai sai bungli masa ni hpe tsun sanglang dan sai. Bai nna Kachin ngu ai sha a nga nga yang KIO masat ninghtoi mung ding grin a nga nga na re lam, dai hte maren KIO hpung shang masha ni a nga nga dingsa KIO hpung mung nga nga na re lam, KIO hpung shang mashi ni bai shangai nna KIO hpung shang masha ni hte KIO prat ban hte ban pra sa wa nga ra ai lam, hpe tsun n-gun jaw lai wa sai. Zuphpawng tingnyang up Du Kaba Hpunggan Zau Nan kawn hpawng hpungdim dat mungga shaga ai hte 1:30pm hta (KIO) masat n'htoi zuphpawng hpe ngut kre lu sai lam chyelu ai.

Wunpawng Mungdan Shanglawt Hpung (KIO) Masat N'htoi zuphpawng hta mung shawa, dap shawa marai 400 jan sa du ai. Hkying 2:30pm hta (KIO) Masat Nhtoi gawdin ninggang shingjawng poi ( Final ) hpe Laiza Muklum Zup Awng Simsa Gawdin Ginsup Pa hta galaw ai lam chyelu ai. Shana hkying 7:00pm hta Sinpraw Majoi Manau Gawknu hta (KIO) masat n'htoi yungwi pinra nga ai lam matut chyelu ai.

Saranum Kaba N'brang Ah Bu, n nga mat wa sai

Jan Sarasum Kaba N’brang Ah Bu, asak (64) ning gaw ndai bat Langai Ya shani, (22/10/2007) Myenmung aten hkying 10:50 a.m. hta, Yangon Mare, ‘Asia Tawwin Tsirung’ kaw Sai-rawt ana a majaw, akajawng sha Madu Yesu hta yup pyaw mat wa sai re.

Saranum gaw, shi a kasha Gum Ja machyi sawng ai hpe wa gawan yu na sa du nga ai ten, shi mahtang akajawng sha baw nu hte sinwawp ni kaw sai lung wa ai hte n dum mat ai ta, n nga mat ai re lam, Yangon mare Jinghpaw lawk shiga kawn chye lu ai.

Saranum Ah Bu a hkawmtsawp moimang hpe dai ni, bat Manga Ya shani (26/10/2007) hkying 10:00 a.m. hta Yangon, Htingpyin Lupwa hta wan nat nna n-ra hpe Jinghpaw Mungdaw, Myitkyina Mare de la wa nhtawm, Jaw Bum lagaw na Wunpawng Hkristan lupding lupra hta makoi mayang na re lam, dum nta masha ni kawn chye lu ai. Saranum Kaba Ah Bu gaw, shawngde Myitkyina Sara Tai Jawng (Teacher Training School, TTS) kaw shaning na na wa sara galaw lai wa nna, 1998 kaw nna 2003 du hkra Myitkyina Asuya Lahta Tsang Jawng, Masat (5), kaw mung Jawng Up hpe shaning law law galaw lai wa nna, ya, Nawngnang Jinghpaw Wunpawng Chyum Hkawlik (KTC) e English sharin saranum hku nna apnawng gun hpai nga ai re.
Saranum Kaba Ah Bu gaw, Hkristan makam masham kaba ai hte, shi naw Lahta Tsang Jawng-up galaw wa sai ten, jawngma ni hpe akyu hpyi woi ai lamang ni galaw wa sai lam, Masat (5) Lahta Tsang jawngma dingsa ni kawn chye lu ai.

Ya ten, Myenmung shara shagu e du nga ai Saranum Kaba Ah Bu a jawngma dingsa ni yawng gaw, grai yawn hkyen hkrum nga ai lam, Yangon kaw du nga jawngma dingsa ni, daina maga KNG de tsun shana wa ai.