Saranum Kaba N'brang Ah Bu, n nga mat wa sai

Jan Sarasum Kaba N’brang Ah Bu, asak (64) ning gaw ndai bat Langai Ya shani, (22/10/2007) Myenmung aten hkying 10:50 a.m. hta, Yangon Mare, ‘Asia Tawwin Tsirung’ kaw Sai-rawt ana a majaw, akajawng sha Madu Yesu hta yup pyaw mat wa sai re.

Saranum gaw, shi a kasha Gum Ja machyi sawng ai hpe wa gawan yu na sa du nga ai ten, shi mahtang akajawng sha baw nu hte sinwawp ni kaw sai lung wa ai hte n dum mat ai ta, n nga mat ai re lam, Yangon mare Jinghpaw lawk shiga kawn chye lu ai.

Saranum Ah Bu a hkawmtsawp moimang hpe dai ni, bat Manga Ya shani (26/10/2007) hkying 10:00 a.m. hta Yangon, Htingpyin Lupwa hta wan nat nna n-ra hpe Jinghpaw Mungdaw, Myitkyina Mare de la wa nhtawm, Jaw Bum lagaw na Wunpawng Hkristan lupding lupra hta makoi mayang na re lam, dum nta masha ni kawn chye lu ai. Saranum Kaba Ah Bu gaw, shawngde Myitkyina Sara Tai Jawng (Teacher Training School, TTS) kaw shaning na na wa sara galaw lai wa nna, 1998 kaw nna 2003 du hkra Myitkyina Asuya Lahta Tsang Jawng, Masat (5), kaw mung Jawng Up hpe shaning law law galaw lai wa nna, ya, Nawngnang Jinghpaw Wunpawng Chyum Hkawlik (KTC) e English sharin saranum hku nna apnawng gun hpai nga ai re.
Saranum Kaba Ah Bu gaw, Hkristan makam masham kaba ai hte, shi naw Lahta Tsang Jawng-up galaw wa sai ten, jawngma ni hpe akyu hpyi woi ai lamang ni galaw wa sai lam, Masat (5) Lahta Tsang jawngma dingsa ni kawn chye lu ai.

Ya ten, Myenmung shara shagu e du nga ai Saranum Kaba Ah Bu a jawngma dingsa ni yawng gaw, grai yawn hkyen hkrum nga ai lam, Yangon kaw du nga jawngma dingsa ni, daina maga KNG de tsun shana wa ai.