KBC ramma zuphpawng na wa ai mawdaw 2 galau nna, marai 1 si

Nbapa, KBC Ramma Zuphpawng kaba ngut nna, tinang buga de bai wa ai mawdaw lahkawng gaw, dai ni lam lapran galau nna, marai 1 si, marai 20 jan laja lana hkala hkrum mat ai lam, chye lu ai.
Ndai Miwa hpun htaw mawdaw (Tong Hpung) hte Nissan Hilux gaw, Nbapa kawn Mai Ja Yang de gawt lung wa ai shaloi, lam lapran Maibat e galau ai re lam, Miwa ga jarit na ramma langai KNG de shana wa ai.
Ya si mat sai ramma gaw, Mai Ja Yang mare na Shayi Nhkum Htu Raw, asak (19) ning rai nna, shi gaw Slg. Nhkum Zau Awng hte jan Marip Htu yan a shayi sha re lam, Mai Ja Yang shiga lawk kawn chye lu ai.
Mawdaw galau nna hkala hkrum ai ni gaw, Tong Hpung mawdaw hta marai 20 jan hte Nissan Hilux hta marai 5 rai nna, ta daw, lagaw daw, shinglet di, wa run rai, ningma sawng ai hte, malap mat ai ni mung lawm ai lam, matut chye lu ai.

Kachinnews.com