Subscribe For Free Updates!

We'll not spam mate! We promise.

Mung Dan a labau gadun mi Tsun dan ai

I. K.I.O NING BAW, TAI AI, "SAI" HKA, AN NAU NI LU

Nu yen Wa hpang , Jinghpaw Wunpawng amyu ni n-nan rawt malan hpang wa yang.

Wunpawng Mung Dan Gumrawng gumtsa, Shanglawt asuya, Shing teng amying jaw n-na, Myen hpyen asuya a Mung Hpawm Mung dan ahkaw ahkang yawng hpe, laba gaup ai majaw, 1949/2/16 ya shani kaw n-na Du kaba Lahpai Naw Seng, Panglung Mung Hpawm, Myit hkrum ga sadi laika hte, nhtan shai ai, Maw lanyet mung masa, hpyen masa hpe, n-jaw ai, n-ra ai majaw, Mung hpawm Jinghpaw hpyen dap ni hpe woi zinlum n-na gumlan ning hkap hpang wa sai.
1961/2/5 ya shani kaw n-na, Du kaba Lahtaw Zau Seng woi awn ai Myen hpyen, Mung hpawm mung masa hpe, n-rap ra ai, n-tara ai masu magaw, manai makai re, mung hpawm mung masa hkalem ai majaw K.I.A / K.I.O rawt malan hpang sai.

HPA MAJAW DAI NI PAN DUNG SHAI WA AI.

K.I.O hpyen hpung byin mat ai.
Gap hkat jahkring ai K.I.O byin wa ai.
Myen hpyen dap asuya a, mung masa woi awn ai hpe, Madi shadaw ai K.I.O byin wa ai majaw, gawmai gawsha, Nu yan Wa a bunglat hka hpe tsang dik ai.

Myen mung Wunpawng hpu nau yawng hte, grup yin mung dan, yawng ning hkap nga ai kata, K.I.O ning baw ni hte Nu yan Wa, Jinghpaw Wunpawng amyu sha ni a, shing gyim ahkaw ahkang hte, mung daw hpe 2008/5/10 ya Myen hpyen dap asuya hpe gwi gwi hte dut sha dat kau masai.

Nu yan Wa e, Rawt malan wa ai shaning shata nhtoi hte hpyen la hpyen ma ni hte, Mung chying shawa a salu salat, dubaw, hkrat sum kau ai kaman li la rai jang n-mai na re. Ya an nau ni hte rau K.I.O ning baw ningla ni a kasha yawng, Amyu a matu, shawng lam majan pa hta asak ap nawng ai gadai nga wa sata?

II. NU YAN WA DUM NING LEN.

Jinghpaw Wunpawng amyu mung daw masat lu ai, Moi jiwoi jiwa ni, bungli n-lu n-na gumchying gumsa lai hte gasat da ai n-re.
Ra n-na asak du baw si hkam let gasat da ai mung daw re.
Jinghpaw Wunpawng amyu sha ni mayat maya law htam wa n-na, wang lu wang lang galaw sha lu na matu re.
Nga mu nga mai rawt jat galu kaba ai amyu tai wa ai shani, Maigan mung dan yawng hte matut mahkai ganawn mazum hkawm sa hkawm wa lu na matu re.
Tinang mung dan ahkaw ahkang kata na, manu dan ja lung seng ni hte n-hprang sut rai ni, maisak mailung yawng, chyasam ni kaw hpyi n-ra na matu re.
Tinang a ga, tinang a laika, tinang a bu hpun sumli, tinang a htung hking, tinang a labau, tinang amyu mung dan sharawt lu na matu re.
Shada makawp maga ganawn mazum, garum shing tau hkat myit hkrum n-gun shabawn, tara mai gan yawng e, hkrit hkunga, agam n-na, tinang amyu htung hking makam masham hpe, gadai nroi lu hkra myit mada n-na, gasat maga da ai lamu ga gin ra re.
K.I.O ning baw ni hte N.D.A /K.D.A / Lasang Awng hpung yawng hte e tinang kashu kasha ni a matu mung myit yu ga. Madu sak hkrung nga ai laman na hpe sha yu n-na tinang kashu kasha ni a shawng lam, ban hte ban, prat hte prat htum n-nga ai mat n-mai, prai ngu ai n-lu, hka ni hpe an nau ni gun ra saga ai.

Ka ai..
Nu yan Wa hte ning baw ningla ni jaw ai amyu yubak, gun ndang madai taw ai Kasha.
( U HKAI )

No comments:

Kachinbee. Powered by Blogger.