LWI AI HKA DE.

Anhte Wunpawng buga ginra hpe, anhte a jiwoi jiwa ni asak sai, law law asum hkam let makawp maga lai wa sai lam hpe daini na prat ban hta asak hkrung nga sai Chyurum Wunpawng sha ni yawng chye na sai hpe kam ai. Mungkan hpaji mi nchye tim, shanhte a lamu ga, shanhte a nhprang sut gan/rai ni hpe chyasam wa loi mi pa sa kajam ya ai pyi nra ai, tinang a sut gan hpe manu shadan let Karai jaw ai tara hte hkrak rai nna up hkang makawp maga hkrat wa masai. Raitim, daini na aten mungkan hpaji hpe chye chyang wa sai ni gaw gara hku kun?

Lai wa sai aten na anhte a ji wa ni gaw, tinang a buga ginra mare mare na hpun, kawa ni hpe ra ai hta jan nna shaw jai lang ai lam nnga ai. Dai hta n-ga dai mare mare hta laning mi hpun ngau shaw ai loi mi law sai nga yang, dai mare salang du gyi ni gaw shawa n-gun shaga nna hpun ni hpe bai hkai shajang ma ai da. Dai hte maren anhte nam nga dusat dumyeng ni hpe mung pagawn para gap sat zingri ai lam nnga ai da. Lama na jau gawng ai wa shan gap sa ai rai yang, u lun ta hkan lama ang yang "ayi" ni hpe n-gap ma ai da. Dai zawn re lam ni gaw, nam nga dusat dumyeng ni hpe makawp maga hkang zing la ai lam rai nga ai. Mungkan hpaji nchye tim Karai jaw ai hparat hte dai zawn makawp maga lai wa sai re. Daini na Wunpawng sha ni gaw dai hku gaw rai ma ai kun? Tinang hkum tinang myit yu saga. Daini gaw anhte ni yawng myit yu ra na aten du sai ngu kam ai.

Anhte a nhprang sut rai ni hpe masha lata hte zingri ai lam n law shi ai! Jak hte she grau asi asat she bai rai nga ai. Dai hte maren nam nga dusat dumyeng ni hpe mung dai zawn kam mara tara n lang ai sha zingri zingrat galaw nga ga ai. Dai hta n-ga, Hka kata na nga ni hpe mung hkam sha ai hte sha myit ndik, tsi hte gat mana sat, Bawm hte kapaw sha ai hta n-ga, Dat wan ni hte kaba sat rai madu myit ni nrawng ai sha zingri sat ai maga hku jai lang nga ga ai majaw daini hka shi hka nu hkan, hka nga dusat ni yawm mat ai sha n-ga, nga amyu nan mat ma sai shara nan she rai mat wa sai. Dai zawn galaw taw nga ai ni hpe yu yang, masha chyasam ni hta grau galaw zingri taw nga ai gaw, anhte Karai hpe kam sai, n'htoi hpe lu sai ngu nna marawn taw nga ai anhte Wunpawng sha ni nan rai nga ga ai. Karai Kasang ra ai lam rai sai kun? Myit yu ra nga saga ai. Karai Kasang hpan da ya ai anhte a ginra, nhprang sut gan ni hpe manu shadan, ra ai hta jai lang ai hku sha nrai, n-gun mi a lu jahten shaza nga ai gaw jaw nga ga ai kun? Jawm myit yu let kaja ai lam hpe lata sa chye ra nga saga ai.

Lani mi Wunpawng ramma langai mi hte hkrum shaga hkrup yang, shi myit hta gaw Hpun lawk gara maga de bai "A' hpang wa na kun? ja maw kara de grau nga ai kun? ngu nna she maja taw nga ai lam na chye lu ai. Hpa majaw dai nhprang sut rai ni hpe myi ju nga ai rai ngu nna san yu yang! Masha ni pa dai hku she galaw sha nga yang, ngai n galaw yang gaw mana she rai le; ngu nna she tsun nga ai. Dai zawn sha Wunpawng sha ni yawng hta rawng nga yang gaw "Ngut sai"..... Daini Wunpawng ramma ni hpaji ram daw shing nrai dakkasu jawng ngut sai ni hpa galaw nga ma ai kun? Anhte makau hta maram dat yu yang gaw Kalang mi a matu la taw nga ai ni hkrai wa le! Masha gaw kalang mi jaw shing nrai kalang mi lu sha na matu sha myit nga yang shut na sai yaw! Lama na nang la taw nga ai Kalang nsa wa yang gara hku di na? Daini na ramma ni jawng ngut tim hpa n-galaw ai sha, mara gayin shagun gayin shagun rai nga ai ni hkrai she rai sai. Dai majaw Ja Maw, Hpun Maw, Lung Seng Maw de she man yawng nga ma sai. Daini na prat hpaji hpe chye chyang sai ramma nang myit yu u. " Ing nga ai hka hpe ja lu na kun? Lwi ai hka hpe ja lu na kun? Ing nga ai hka hpe ja lu nga yang gaw lani mi na aten hta hkyet mat, ma mat wa na re.Lwi nga ai hka chyawm gaw na a matu galoi mung n hkyet mat ai sha lwi nga na. Daini nang myi yu ju taw nga ai Ja Maw, Hpun Maw, Lung Seng Maw ni gaw Ing nga ai hka hte bung nga ai. Dai majaw na a makau grupyin na n hprang sut rai ni hpe makawp maga let, lwi ai hka hpe ja lu ga ngu! Kraw hkrat ga si hpe tang madun let,

Myu Tsaw Brang (MLY)
From: :Grup yin shanan Magazine
Vol-4, Nov. 2007
Nang ngai yawng a matu ngu yaw shada let.. kachinbee.