WUNPAWNG MUNGDAN SHANGLAWT HPUNG GINJAW KOMITI PRAN WAN HKUMRA ZUPHPAWNG GALAW

Ninghtoi; May 12, 2009

Wunpawng Mungdan Shanglawt Hpung Ginjaw Komiti pran wan hkumra zuphpawng hpe May shata 11 hte 12 ya shani Wunpawng Mungdan Shanglawt Hpung (KIO) uphkang ginra Laiza, Ninggawn Daju kaw galaw wa sai.

Zuphpawng hta KIO Ginjaw Salang ni, Ginwang Ginjaw shagu na ningbaw ningla ni, Wupawng Mungdan Shanglawt Hpung Amyu Shayi Ginjaw ningbaw ningla ni hte lit nga ai Salang ni shanglawm nna bawngban daw dan mat wa ai re lam chye lu ai.

Zuphpawng hta, KIA hpe hkrang galai hpaw shabawn na matu SPDC Asuya a hpyi shawn ai lam gaw, tinang KIO hku nna sung sung li li myit yu ra ai lam re ngu hkam la ai. Asuya hte hkut hkut nai nai bawngban jahkrup hkat lu ai hpang she daw dan sa wa na matu myit hkrum daw dan ai.

Munghpawm Myanmar Mungdan Asuya seng ang ai ni hte KIO a lapran e hkrum shaga bawngban lam bungli ra sai re ai majaw KIO Ginjaw Komiti gaw Dat Kasa Hpung langai mi laksan hpaw shabawn na matu myit hkrum daw dan ai.

Munghpawm Myanmar Mungdan Asuya seng ang ai ni hte KIO a lapran hkrum shaga bawng ban sa wa ra ai lam gaw, KIO Wuhpung Wuhpawng hte sha seng ai lam n rai nga ai, Wunpawng amyu hte Wunpawng Mungdan sha shawa daw tsa n lang hte seng nga ai re majaw, lapran tsap shaga lawm ra wa ai lam hta karum na matu Simsa Lam Tam Salang Hpung hpe mung karum hpyi shatsam lit jaw sa wa na matu myit hkrum daw dan ai.

SPDC Asuya maga kaw nna KIO Ginjaw hpe tsun tawn ai lam tsun dan ai hte laikajaw tawn ai lam hpe tsun shaleng sang lang dan nna, KIO Ginjaw Salang ni hte lit nga ai ningbaw ningla myit su du salang yawng, Magam gun masha, magam dap kata hte kanu kawa mungchying shawa yawng the mungkan mungdan shara shagu chyam bra nga ai Wunpawng sha ni yawng kaw na hpaji hpyi shinggyin la na hte ahkyak ai hpaji jaw lam ni hpe Ginjaw Komiti de laika hte tang shana jaw shangun na matu myithkrum daw dan ai.

Ndai Ginjaw Komiti Pran Wan Hkumra Zuphpawng a myit hkrum daw dan ai lam hpe dap shawa, mung shawa de mung chye lu na matu ndau shabra ai lam galaw na hpe myit hkrum daw dan ai rai nna, zuphpawng hpe May shata 12 ya shana hkying 7:00 Pm aten manhkrum lu sha hpawng hpe galaw let hpungdim dat sai lam chye lu ai.


Lakap let: Kachinnet.............