Lai wa sai July Shata praw 24 - 25 ya hta Jinghpaw Wunpawng Laili Laika hte Htung Hking Hpung ( J.L.H ), Mandalay Dakkasu Jawngma, Shayi Shadang ni woi awn let, Htung Hking Hkaw Tsun Hpawng hpe, Mandalay , Aungpinle shara hta galaw Lai wa sai lam hpe chye lu ai.
Dai Hkaw Tsun Hpawng hpe Mandalay J.L.H hte rau, Mandalay J.L.H a Lakung rai nga ai,
Mongywa J.L.H, Magwe J.L.H hte Mikhtila J.L.H na Dakkasu Ramma ni lawm nhtawm Jawngma Yawng rai yang Marai ( 100 ) jan sa du shang lawm ai lam hpe Hpawng Shabyin shatai Komiti ( J.L.H Mandalay ) kawn chye lu ai.
Hkaw Tsun Hpawng a Gabaw gaw “ Globalization hte dai ni na Wunpawng Htung Hking” re lam hpe mung chye lu ai. Sara kaba Pungga Ja Li hte Sara Hprup La San yen sa du lawm let,
Sara kaba Pungga Ja Li gaw Wunpawng Sha ni a, Num Wawn Num la hte seng ai Lak Jet ni hpe madung tawn let tsun dan mat wa ai. Sara Hprup La San gaw Shachyen Shaga Lam hta ra ahkyak ai lam ni hpe Madung tawn Hkaw tsun dan mat wa ai lam ni hpe mung katap chye lu ai.
Ndai Hpawng a Madung Yaw Shada lam ni gaw:
1. Jinghpaw Wunpawng Dakkasu ramma ni Wunpawng Htung Hking hpe grau n-na Manu Shadan, Akyu Jashawn Jai Lang Makawp maga chye na matu.
2. Jinghpaw Wunpawng Dakkasu ramma ni shada da Kahyin Gumdin n-na Amyu a matu dawjau chye ai Dakkasu ramma ni byin tai lu na matu re lam hpe mung chye lu ai.
J.L.H Dakkasu Jawngma ni gaw lai wa sai 61 ning Hpring Jinghpaw Mungdaw N’htoi masat Manau Poi kaba hta Dawjau hku n-na shang lawm lai wa sai. Bai 48 ning hpring 49 lang na Ning Gawn Shadip Manau Poi kaba hta mung sa du shang lawm lai wa sai. 2008 - 2009 ning Hpaji Ladaw na Dakkasu Jawngma ningnan Hkalum Hpawng Hpe mung lai wa sai February Shata 21 ya Shani hta Pyin Oo Lwin Mare hta galaw la lu sai re lam ni hpe mung chye lu ai.
