60 ning hpring Jinghpaw Mungdaw N’htoi, Manau Poi kaba galaw hkyen nga

Du wa na praw (5) ya shani kaw na praw (11) ya shani du hkra Jinghpaw Mungdaw mare daju Myitkyina, Shatapru Manau Wang kaba hta Jinghpaw Mung (60) ning hpring n’htoi masat masa manau poi kaba hpe galaw na matu hkyeng la jang taw nga sai re.

Ndai manau poi kaba hpe maning na hta grau kaba ai hku galaw sa wa na re lam Manau Poi Shabyin Shatai Committee malawm langai KNG de tsun dan wa ai, “Dai ning na manau poi gaw aten mung galu nna, shara shagu de na du sa wa na Mungshawa masha yawng a jahpan n’tsa lam, ya ten jahpan du nga ai pi gaw, mun kaba rai nga sai” nga ai.
Ya galaw na (60) ning hpring Jinghpaw Mungdaw Manau poi kaba byin tai lu na matu, Jinghpaw sutdu ni yawng mying hkrum nna ja gumhpraw shaw lit chyawm la taw nga ai hpe mung chye lu ai.
Ya ten, manau alu jaw bang na n-gup ga sadi jaw tawn sai uhpung ni gaw, KIO/A kawn Kyat sen 1,200, NDA-K kawn Kyat sen 600 hte Lasang Awng Wa Simsa Lam Hpung kawn Kyat sen 300 re lam, shanhte hte ni kahtep ai shiga lawk kawn chye lu ai.
Ndai Jinghpaw Mungdaw byin tai wa ai 60 ning hpring masat manau poi kaba a matu hkrat ang gumhpraw (budget) Kyat sen 4,000 jahkrat tawn ai lam, Manau Komiti kawn chye lu ai.
Jinghpaw gap hkap jahkring hpung kaba, KIO/A gaw tinang uhpung masha marai 1,000 mi shanglawm na lam hpe, ya ten kawn Manau Poi Shabyin Shatai Komiti de jahpan jaw tawn sai lam, chye lu ai.