(50) Ning hpring Amyu Sha Rawt Malan Masat Ninghtoi hta maigan mungdan shara shagu de du nga ai Wunpawng Amyu Sha ni yawng hpe htet shana dat ai.
Wunpawng Mungdan Shanglawt Hpung (KIO) gaw jet ai Munghpawm (Federal Union) byin tai wa hkra n’gun kaba hte lahkam sa wa nga ai re.
Dai zawn byin tai wa lu na matu;-
- Mungdan kata na rudi amyu sha laknak lang rawt malan hpung ni yawng hte rudi amyu sha wuhpung wuhpawng yawng myit hkrum n’gun kahkyin wa lu hkra lam tam myit ningchyan shaw shakut nga ai.
- Jet ai munghpawm byin tai wa na hpe ra sharawng ai mungdan kata na mungmasa wuhpung wuhpawng ni hte lata gindun n’gun gumhpawm lu hkra shakut nga ai.
Ndai zawn aten ladaw sat lawat kaja aten hta maigan du nga ai Wunpawng Amyu Sha ni yawng mung ningmu hkrum, makai hkak hkak hte Amyu Sha lam yan hpe tinang du nga ai shara kaw nna mahkrun tam shang lawm na gaw madung rai nga sai.
Amyu sha rawt malan magam lit hta ladat amyu myu hku nna madi shadaw shang lawm nhtawm myit mada ai pandung de du hkra jawm shakut sa wa ga.
Amyu sha mungmasa magam lit hpe Mali Hka nu lwi ai zawn matut n di ginlen sa wa na matu Wunpawng Amyu Sha Ramma yawng hpe lit jaw shatsam dat ai.
(50) Ning hpring Amyu Sha Rawt Malan Masat Ninghtoi hta Wunpawng Mungdan Shanglawt Hpung, Ginjaw Komiti Tingnyang Up kaw nna Wunpawng Amyu Sha yawng hpang de htet shana ai Rawt Malan Mungga hpe mung shagun jaw dat ai.
Ginjaw Komiti
Wunpawng Mungdan Shanglawt Hpung
